Үөһээ Бүлүү улууһугар сэтинньи 6 күнэ – БИҺИРЭМ ТЫЛ КҮНЭ. Бу күн төрөөбүт Ийэ тылбыт хараанньыта, сэрии сылын оҕото, сахалыы саҥабыт эмчитэ, лиҥкибиис-учуонай, саха саарына Мэхээлэ Бөтүрүөбүс Өлөксүөйэп-Дапсы төрөөбүт күнэ. Сыл ахсын бу күн, сэтинньи 6 күнүгэр, улуус үрдүнэн “Дапсы дьыктаана” тэрээһин ыытыллар. Тэрээһин сыала-соруга: Ийэ тыл туттуллар эйгэтин кэҥэтии, төрөөбүт тылбытын өрө тутуу. Ыччаты төрөөбүт тылы харыстыырга угуйуу, үөрэтэргэ тардыы.
Быйыл төрдүс төгүлүн ыытыллар “Дапсы дьыктааныгар” биһиги нэһилиэк көхтөөх кыттыыны ыллыбыт, уопсайа 14 киһи кыттан ийэ тылларын төһө билэллэрин тургутан көрдүлэр. Түмүккэ “Туйгун суруксут” ааты ылла – Елена Алексеевна Романова, бочуоттаах сынньалаҥҥа олорор география учуутала, “Үчүгэй суруксут” ааты ыллылар нэһилиэк баһылыга Петр Прокопьевич Иванов, быраас Клара Ивановна Барчахова, эдэр ийэ Сахая Степановна Готовцева, бары кыттыылаахтарга туоһу сурук туттарылынна.
