Россияҕа Дьиэ кэргэн, Сахабыт сиригэр Оҕо саас сылларын чэрчитинэн, Ийэ тыл, сурук-бичик күнүгэр аналлаах “Ийэ тыл алыптаах эйгэтигэр” Тамалакаан нэһилиэгин элбэх оҕолоох дьиэ кэргэттэрин ыккардыгар күрэх буолан ааста. Күрэххэ элбэх оҕолоох дьиэ кэргэттэр көхтөөхтүк кыттан, астына-дуоһуйа сынньанан бардылар. Күрэх 6 түһүмэҕинэн ыытылынна: дьиэ кэргэнинэн ыйытыктарга хоруйдаатылар, ыал а5алара өс хоһооннору ситэрдилэр, оҕолор таабырын таайдылар, ийэлэр Дьиэ кэргэн уонна Оҕо сылын бэлиэтин кумааҕынан кырыйан оҥордулар, бэлиэлэрин өйдөбүлүн кэпсээн көмүскээтилэр, бэриллибит 4 тылы туһанан түөрт строкалаах хоһоон айан күрэстэстилэр, түмүккэ хамаанданан сатабылга араас оонньуу оонньоотулар. Күрэх түмүгүнэн муҥутуур кыайыылаахтарынан Афанасий, Варвара, Чэмэлиинэ Терентьевтар буолан “Ийэ тыл куттаах дьиэ кэргэн” анал аат хаһаайыттара буоллулар. Иккис үрдэлгэ Эльдар, Анна, Элина Алексеевтар тахсан “Сайдам саха ыала” анал ааты сүктүлэр, үһүс бочуоттаах үрдэл – Михаил, Анастасия, Харлампий Федоровтар, “Байылыат ыал” анал аат иҥэрилиннэ. Кыайыылаахтар добун суругунан, анал бирииһинэн наҕараадаланнылар.